శ్రావణబహుళాష్టమి సవరేత్రికాడను శ్రీవిభుఁడుదయించెఁ జెలులాల వినరే

మాళవశ్రీ
శ్రావణబహుళాష్టమి సవరేత్రికాడను
శ్రీవిభుఁడుదయించెఁ జెలులాల వినరే. IIపల్లవిII

అసురుల శిక్షించ నమరుల రక్షించ
వసుధభారమెల్లా నివారింపను
వసుదేవునికిని దేవకీదేవికిని
అసదృశమగు కృష్ణుఁ డవతారమందెను. IIశ్రావణII

గోపికలమన్నించ గొల్లలనెల్లాఁ గావఁగ
దాపై మునులనెల్లా దయసేయను
దీపించ నందునికి దేవియైనయశోదకు
యేపున సుతుఁడై కృష్ణుఁడిన్నిటాఁ బెరిగెను IIశ్రావణII

పాండవుల మనుపఁగ పదారువేలఁ బెండ్లాడఁగ
నిండి శ్రీవేంకటాద్రిపై నిలుచుండఁగా
అండ నలమేల్మంగ నక్కునఁ గాఁగిలించఁగ
దండియైయుండఁ గృష్ణుఁడు తగ నుతికెక్కెను. IIశ్రావణII ౪-౨౮౭

సతులాల చూడరే శ్రావణ బహుళాష్టమిఁ

సతులాల చూడరే శ్రావణ బహుళాష్టమిఁ
గతలాయ నడురేయిఁ గలిగె శ్రీకృష్ణుఁడు. IIపల్లవిII

పుట్టేయపుడే చతుర్భుజాలు శంఖుచక్రాలు
యెట్టు ధరియించెనే యీ కృష్ణుఁడు
అట్టె కిరీటము నాభరణాలు ధరించి
యెట్టనెదుట నున్నాఁడు యీ కృష్ణుఁడు. IIసతుII

వచ్చి బ్రహ్మయు రుద్రుడు వాకిట నుతించఁగాను
యిచ్చగించి వినుచున్నాఁ డీ కృష్ణుఁడు
ముచ్చటాడీ దేవకితో ముంచి వసుదేవునితో
హెచ్చిన మహిమలతో యీ కృష్ణుఁడు. IIసతుII

కొదదీర మరి నందగోపునకు యశోదకు
ఇదిగో తా బిడ్డఁడాయ నీ కృష్ణుఁడు
అదన శ్రీ వేంకటేశుఁడై యలమేల్మంగఁ గూడి
యెదుటనే నిలుచున్నాఁ డీ కృష్ణుఁడు. IIసతుII ౧౪-౪౫౩

సతులాల చూడరే శ్రావణబహుళాష్టమి

సాళంగనాట
సతులాల చూడరే శ్రావణబహుళాష్టమి
గతలాయ నడురేయిఁ గలిగె శ్రీకృష్ణుఁడు. IIపల్లవిII

పుట్టేయపుడే చతుర్భుజాలు శంఖుచక్రాలు
యెట్టు దరియించెనే యీ కృష్ణుఁడు
అట్టె కిరీటము నాభరణాలు ధరించి
యెట్ట నెదుట నున్నాఁడు యీ కృష్ణుఁడు. IIసతుII

వచ్చి బ్రహ్మయు రుద్రుఁడు వాకిట నుతించఁగాను
యిచ్చగించి వినుచున్నాఁ డీ కృష్ణుఁడు
ముచ్చటాడీ దేవకితో ముంచి వసుదేవునితో
హెచ్చినమహిమలతో యీ కృష్ణుఁడు. IIసతుII

కొద దీర మరి నందగోపునకు యశోదకు
ఇదిగో తా బిడ్డఁడాయ నీకృష్ణుఁడు
అదన శ్రీవేంకటేశుఁడై యలమేల్మంగఁ గూడి
యెదుటనే నిలుచున్నాఁ డీ కృష్ణుఁడు. IIసతుII ౧౪-౪౫౩

అరయ శ్రావణ బహుళాష్టమి చంద్రోదయాన

లలిత
అరయ శ్రావణ బహుళాష్టమి చంద్రోదయాన
సిరులతో నుదయించె శ్రీకృష్ణుఁ డిదివో IIపల్లవిII

వసుదేవుని పాలిటి వరతపోధనము
యెసగి దేవకీదేవి యెదపై సొమ్ము
సుసరాన గొల్లెతల సొంపు మంగళసూత్రము
శిసువై వుదయించె శ్రీకృష్ణుఁ డిదివో IIఅరII

నందగోపుడు గన్న నమ్మిన నిధానము
పొందగు యశోదకు పూజ దైవము
మందల యావులకును మంచి వజ్రపంజరము
చెంది యుదయించినాడు శ్రీకృష్ణుఁ డిదివో IIఅరII

సేవసేసే దాసుల చేతిలోని మాణికెము
శ్రీవేంకటాద్రి నేచిన బ్రహ్మము
వోవరి నలమేల్మంగ నురముపైఁ బెట్టుకొని
చేవదేరె నుదయించె శ్రీకృష్ణుఁ డిదివో IIఅరII 13-333