|
ఆహిరి
శిఱుత నవ్వులవాఁడు శిన్నెకా వీఁడు
వెఱపెఱఁగడు సూడవే సిన్నెకా. IIపల్లవిII
పొలసుమేనివాఁడు బోరవీఁపువాఁడు
సెలసు మోరవాఁడు సిన్నెకా
గొలసుల వంకల కోరలతో బూమి
వెలసినాఁడు సూడవే సిన్నెకా. IIశిఱుతII
మేఁటి కుఱుచవాఁడు మెడమీఁది గొడ్డలి-
సీటకాలవాఁడు సిన్నెకా
ఆఁటదానిఁ బాసి అడవిలో రాకాశి-
వోఁటలాడీఁ జూడవే సిన్నెకా. IIశిఱుతII
బింకపు మోఁతల పిల్లఁగోవివాఁడు
సింక సూపులవాఁడు సిన్నెకా
కొంకక కలికియై కొసరి కూడె నన్ను
వేంకటేశుఁడు సూడవే సిన్నెకా. IIశిఱుతII౫-౧౮౨
ఈ సంకీర్తనలో దశావతార సమన్వయం ఉంది.
పొలసుమేనివాఁడు= మత్స్యావతారం
బోరవీఁపువాఁడు= కూర్మావతారం
సెలసు మోరవాఁడు= వరాహావతారం
కోరలతో బూమి వెలసినాఁడు= నరసింహావతారం
మేఁటి కుఱుచవాఁడు= వామనావతారం
మెడమీఁది గొడ్డలి సీటకాలవాఁడు= పరశురామావతారం
ఆఁటదానిఁ బాసి అడవిలో రాకాశి వోఁటలాడీఁ= రామావతారం
పిల్లఁగోవివాఁడు= కృష్ణావతారం
సింక సూపులవాఁడు= బుద్ధావతారం
కలికియై= కల్క్యావతారం
