శ్రావణబహుళాష్టమి సవరేత్రికాడను శ్రీవిభుఁడుదయించెఁ జెలులాల వినరే

మాళవశ్రీ
శ్రావణబహుళాష్టమి సవరేత్రికాడను
శ్రీవిభుఁడుదయించెఁ జెలులాల వినరే. IIపల్లవిII

అసురుల శిక్షించ నమరుల రక్షించ
వసుధభారమెల్లా నివారింపను
వసుదేవునికిని దేవకీదేవికిని
అసదృశమగు కృష్ణుఁ డవతారమందెను. IIశ్రావణII

గోపికలమన్నించ గొల్లలనెల్లాఁ గావఁగ
దాపై మునులనెల్లా దయసేయను
దీపించ నందునికి దేవియైనయశోదకు
యేపున సుతుఁడై కృష్ణుఁడిన్నిటాఁ బెరిగెను IIశ్రావణII

పాండవుల మనుపఁగ పదారువేలఁ బెండ్లాడఁగ
నిండి శ్రీవేంకటాద్రిపై నిలుచుండఁగా
అండ నలమేల్మంగ నక్కునఁ గాఁగిలించఁగ
దండియైయుండఁ గృష్ణుఁడు తగ నుతికెక్కెను. IIశ్రావణII ౪-౨౮౭

చదివితిఁ దొల్లి కొంత చదివే నింకాఁ గొంత

శ్రీరాగం
చదివితిఁ దొల్లి కొంత చదివే నింకాఁ గొంత
యెదిరి నన్నెఱఁగను యెంతైనా నయ్యో. IIపల్లవిII

వొరుల దూషింతుఁగాని వొకమారైన నా-
దురితకర్మములను దూషించను
పరుల నవ్వుదుఁగాని పలుయోనికూపముల
నరకపు నామేను నవ్వుకోను. IIచదివితిII

లోకులఁ గోపింతుఁగాని లోని కామాదులనేటి-
కాకరిశత్రులమీఁద గడుఁ గోపించ
ఆకడ బుద్దులు చెప్పి అన్యుల బోధింతుఁగాని
తేకువ నాలోని హరిఁ దెలుసుకోలేను. IIచదివితిII

యితరులదుర్గుణము లెంచి యెంచి రోతుఁగాని
మతిలో నా యాసలు మానలేను
గతిగా శ్రీవేంకటేశుఁ గని బ్రదికితిఁగాని
తతి నిన్నాళ్ళదాఁకా దలపోయలేను. IIచదివితిII 4-74

తార వలచినయపుడె తరుణిరతుల

సామంతం
తార వలచినయపుడె తరుణిరతుల
తారసము లెట్లుండు తగవు లెట్లుండు. IIపల్లవిII

తరితీపు లెట్లుండు తాలుము లెట్లుండు
గరువంబు లెట్లుండు కసరు లెట్లుండు
పొరపొచ్చె మెట్లుండు పొలయలుక లెట్లుండు
నెరవరిక లెట్లుండు నెఱుక లెట్లుండు. IIతారII

ఓపికలు నెట్లుండు నొల్లములు నెట్లుండు
చూపోప మెట్లుండు సొలపు లెట్లుండు
దాఁపరము లెట్లుండు తగుమాన మెట్లుండు
కోపంబు లెట్లుండు కొఱఁత లెట్లుండు. IIతారII

సిరిదొలఁకు లెట్లుండు శేషాద్రిపతి కరుణ
కిరవైన సతిమనసు నెపుడు నెట్లుండు
మురిపమది యెట్లుండు ముద్దుఁజనుఁగవమీఁద
నరచందురుని రేక లపుడెట్టులుండు. IIతారII 6-27


తార=తానే
తారసము=తలపాటు
తరితీపు=ఉపేక్ష
తాలిమి=క్షమ, ధైర్యము
కసరులు=కోపములు
పొరపొచ్చెము=భేదము
పొలయలుకలు=ప్రణయకోపములు
నెరవరికలు=
ఎఱుకలు=గుఱుతులు
ఒల్లమి=వలవమి(వలచునకు వ్యతిరేకార్థము)
చూపోపమి=చూపు+ఓపమి=చూపును భరించలేకపోవుట
సొలపులు=పారవశ్యములు
దాఁపరము=ప్రాప్తి
మానము =చిత్తౌన్నత్యము
కొఱఁతలు=
సిరిదొలఁకులు=

అనాది జగమున కౌభళము

anadi jagamuna.wma

నారాయణి
అనాది జగమున కౌభళము
అనేకాద్భుతం బౌభళము. iiపల్లవిii

హరినివాస మీ యౌభళము
అరిది పరమపద మౌభళము
అరిదైత్యాంతక మౌభళము
హరముఖసేవిత మౌభళము. iiఅనాదిii

అమలరమాకర మౌభళము
అమితమునీంద్రం బౌభళము
అమరవందితం బౌభళము
అమరెఁ బుణ్యముల నౌభళము.iiఅనాదిii

అగరాజంబీ యౌభళము
అగణితతీర్థం బౌభళము
తగు శ్రీవేంకటధామవిహారం-
బగు శుభాంచితం బౌభళము. iiఅనాదిii 4-29

చూడరమ్మ యిటువంటి సుదతులు లేరెందు

రామక్రియ
చూడరమ్మ యిటువంటి సుదతులు లేరెందు
యేడనైన నిటువంటి యింతులు వుట్టుదురా. IIపల్లవిII

ముదితనడపులలోని మురిపమే వెయిసేసు
కొదమ గుబ్బలతీరు కోటివేలు సేసు
సుదతి బిత్తరిచూపు సొన్నాటంకాలే సేసు
అదరబింబముతీరు ఆరువేలు సేసు. IIచూడII

సన్నపు నడుము లోని సైకమే లక్ష సేసు
పన్నుగాఁ బిరుఁదువన్నె పదివేలు సేసు
యెన్నిక మెఱుఁగుఁదొడలెంతధనమైనఁ జేసు
నున్నగా దువ్వినకొప్పు నూరువేలు సేసు. IIచూడII

అంగన భాగ్యమెట్టిదో అతిమోహమై తిరు-
వెంగళరాయనికృప వేవేలు సేసునే
బంగారుచవికెలోఁ బడఁతిఁ గూడిన సొంపు
రంగుగాఁ జెలియరూపు రాజ్యమెల్లఁ జేసునే. IIచూడII 5-304